schnapplÜftli · 2015-05-03 · _____ ussflug thun erscht bim friee nachtässe het denn dr mull d...
TRANSCRIPT
SCHNAPPLÜFTLI
E Infobleddli für unseri Gönner Uusgoob 1/2012 _____________________________________________________________________________________________________________________________
E Gschichtli vom -minu
Fasnachts-Voorschau
Info Yyschällete am 25.2.2012
_________________________________________________________________ Vorwort
E Fasnachtstraum (vom –minu) Dr Draum kunnt immer widder. Syt Joore. Syt minere Kindhait. Es isch e Draum, wo viili Fasnächtler dräume. E Alptraum. Es isch am Morgestraich. Und du waisch, in fünf Minute göön d Liechter us. Zaubermomänt. Du dauchsch in die ainzigartig Seeligkait ii, wo 72 Stund duure und e traanige Kater zrugglosst. Di Clique stoot scho vor dr Stammbaiz. D Kopfladärnli brenne – und d d Närve flattere. Dr Major hebt si raabeschwarze Stogg mit em Silberknauf in sine haisse Händ – no vier Minute. Du stoosch ebefalls ii. Hesch d Larve schoo aa und griffsch zum Piccolo. DU GRIFFSCH INS LEERE! Du taschtisch vergääblig in dr lange Däsche – NÜT, KAI PICCOLO – VERGÄSSE! Und in zwai Minute goots los! Panik paggt di, als würd grad e iiskalti Hand nach dim Härz griffe. Du willsch hai renne, aber dini Bai sinn schweer wie Blei. Und du waisch, no ai Minute. "Het öbber e Resärve-Piccolo?", probiersch du in d Nacht z schreie. Du schaffsch es nid, denn die Nacht isch zue hailig – und dr Momänt zue persöönlig. Ai Minute vor em Morgestraich isch jede Faasnächtler mit sine aigene Gedangge uf sim aigene Planet – bi sine Verstoorbene, sine Liebe, bi sine Kinder, die ebefalls irgendwo in dr Reihe stöön. Und denn hüülsch loos, wie e Wasserschleuse – und erwachsch schweissgebaadet. Zerscht muesch di sammle, zrächt finde. Dr Wegger zaigt zwai am Morge. Usserdäm isch Oggdober. Und du kersch di erlichtered wieder um: das isch widder dää Alpdraum gsi .... isch frie koo das Joor ... Ich waiss, dass die maischte Faasnächtler dää Draum hänn. O.k. si dräume iiri Wariante – die ainte hänn d Larve vergässe, die andere verschloofe dr Vieri-Schlaag und die dritte finde iiri Clique nid. Aber immer isches e „Cauchemare“ – e Altpdraum. Als Kind bini amigs schreiend us däm Draum uffgwacht und mi Groosmamme isch nääbe mir uf dr Bettkante gsässe. „Isches widder dr Morgestraich gsii“. Si het mr denn über s Hoor gstriichled und „das isch e ganz e dumme Draum mi Glaine. Wenn wirgligg emool sötsch ooni
Piccolo, Larve oder Clique kurz vor de 4e dört stoo, kümmered sich d Frau Faasnacht um dii – schliesslig isch si für das doo.“ „Und usserdämm isch jeedi verstoorbeni Faasnachts-Seel ain vo däne Stärnli, wo in dr Basler Nacht am Himmel funggle. Und die wache 72 Stund über dii Faasnachtsglügg.“ Komischerwiis bini in de letschte drei Joor nie me uss däm Morgestraich-Draum erwache. „Du hesches abgleggt“, het mi Babbe gmaint. Wo n ich an dr letschte Faasnacht muetterseeleellai bim Martinskirchplatz iigstande bi und s Kopfladärnli beraits glüüchted het und ich zum Piccolo ha welle griffe – isch dört nüt gsi! Mi erschti Reaggzioon: das isch dr Traum, jetzt wachi denn grad uff. Ich bi nid verwache. Es goot no vier Minute bis zum Morgestraich. Und plötzlig isch die paanischi Iiseskelti doo gsi. Ich hätt könne looshüüle – do kunnt e Gstalt vom Züügli, wo sich vor mir paraat macht uff mi zue: „Do nimm!“ Die Figur mit dr Alte Dante-Larve und em schimmernde violette Rogg und dr stränge schwarze Bluuse steggt mir e Piccolo aane. Ooni z überleege hanni’s an d Lippe gnoo und denn sinn d Liechter usgange. Ich ha in d Nacht pfiffe, wo duusig Stärnli am Himmel gfunggled hänn. Uff verschiidene Wääg hanni welle uusefinde, wäär mir dört das Piccolo zuegsteggt het. Ummesuscht. Niemerd mäldet sich und ich leg’s zue de andere in d Faasnachts-Schublade. Wo ich das Piccolo jetzt kurz vor dr Faasnacht füürehoole will, isches nümme dört gsi. Wägg. Ich ha d Linda gfrogt, unseri Huusperle. Si het gsait, dass e alti Dame glütte haig und sich nach em Piccolo erkundigt het. „Ich ha si iinegloo und ihre die Schublade zaigt. Si het sofort drnoo griffe und glächled.“ Villicht bruuchts das Joor widder öbber!“ Und denn isch si fuurt. „Jää, het si kai Kärtli zrugg gloo?“ Ha ich vo dr Linde welle wüsse. Si het dr Kopf gschüttled „Nai, aber sie het e heerligs Parfüüm kaa, wo nach Mimösli duftet het. Und woni nach em Name gfroggt ha, het si nur glächled“: „Faasnacht–Frau Faasnacht“ -minu
Faasnachts-Info _______________________________________________________
Dr gwälti Sujetvorschlaag 2012 kunnt vom Roger. Unseri 29igschti Faasnacht laufe mir under em Thema, wo me zämmegfasst kurz esoo könnt betitle: „Russefründschaft“. Doo alli Detail drzue:
Sujet: „Za Znakomstwa“! * Unser Stadtmaarggeding het s wirgligg dusse und verbändlet uns Basler mit de Russe. * (Russische Dringgspruch, heisst „Darauf, dass wir uns kennengelernt haben“)
Dr Vordraab und die wo pfyffe Kosakin und Kosak ... wunderscheeni Russischi Tracht, marschiert unsere Zuug inere rotschwarze Pracht. Dr Major: D Babuschka, die beriemti Schachtelpuppe, fiirt unseri scheeni Russe-Gruppe. Requisit: D Verbundeheit und d Frindschaft het erkannt, unsere Staab mit em Russe-Banner in dr Hand.
S Programm
Mändig, 27.2.2012
Wie allewiil punggt 04h00 starte mir
d Faasnacht mit em Morgestraich.
Wäär die aimooligi Atmosfääre
zämme mit uns möcht miterlääbe,
muess bim Liechterlösche vis-à-vis
vom Tinguely-Brunne parat stoo.
Dr Cortège starte mir am Mändig am
13h30, au vis à vis vom Tinguely-
Brunne und laufe denn abwärts zum
Barfi, über die Mittleri Brugg zur Muba
und wia Wettstaibrugg und Freiestroos
zrugg zum Märtblatz (zirka 17h30).
Zischtig, 28.2.2012
Mir mache nümm konkreet mit an dr
Kinderfaasnacht. Dr Zischtig isch für
uns Aggtivi also freiwillig. Zoobe
simmer aber sicher zämme
unterwägs, z.b. in dr Altstadt oder im
Ruum Münschterplatz.
Mittwuch, 29.2.2012
14h10 laufe mir ab. Vis à vis vom
Parkhuus-Yygang am Theaterplatz (bi
dr alte Turnhalle). Denn goots uffwärts
zum Banggeblatz und via
Wettstaiplatz, über d Muba und die
Mittleri Brugg, zrugg zum Märtplatz
(zirka 17h30).
Beträffend em nächtlige Gässle könne
mir folgendi Koordinaate duuregää.
Am Määntig zwische 20h30 – 21h00
vom Reschtorant „Al Fiume“
(Totentanz 1) uss und am Mittwuch
(ca. 21h30 - 22h) vom Reschtorant
Lällekönig (am Fischmärt) uss, stäche
mir in die dunggle, verdräumte Gasse.
Am Donnschtig am Morge
(1.3.2012) am 4i wird unsere letschte
Doon an dääre Faasnacht, am Egge
Gärbergass / Leonhardsbärg pfiffe.
Sunntig, 18.3.2012
Bummel-Sunntig: Mir wärde
vorussichtlig zwüsche 19h und 20h d
Freiestroos aabe koo und und denn
uff em Märtblatz halte. Punggt (!)
zääni haissts denn bim Tinguely-
Brunne „Luftschnapperli Achtung!
Ändstraich, vorwärts, marsch!“...
_______________________________________________________ Faasnachts-Info
Als Yystimmig uf unser Sujet 2012, do e baar Häppli zum aaluege. Joo, alles isch do no e bitzeli unfertig abbildet und aadütet – isch klar ... aber mir wänn au nonig grad alles verroote!
Was git ägscht das???? Das isch d „Larve“ vom Pfyffermajor. Mee gseesch denn an dr Faasnacht.
Ussflug Thun __________________________________________________________
Aafang Septämber simmer uf unsere tradizionelle Summer / Herbscht Ussflug gange. OK-Chef isch dr Mull gsi, mit Hilf vo sinere Sandra. Wie immer total g’heim isch alles abgloffe:
Im Mini-Bus vo dr Garage Schmid in Ryynach simmer glii am Morge vom Dreyspitz Richtig Bärn gfaare. Genau gsait simmer uf Thun. Uf dr Hööchi vo Prattele hämmer denn scho Dursch bekoo und dr Wysswyy het e Ründeli gmacht ...
In Thun aakoo hämmer uns in zwei Gruppe ufdailt. Usgstattet mit wenige Informazioone, hämmer uns denn uf e „Fox-Trail“ gmacht. Das isch e Art Schnitzeljagt. Quer durch Thun het me miesse vo Poschte zu Poschte höösele und gwüssi Ufgoobe lööse. Meischt simmer z Fuess unterwägs gsii, aber au dr Bus het me dörfe nää. Verpflägt hämmer uns unterwägs mit de Lönsch-Packetli vom OK.
____________________________________________________ _____ Ussflug Thun
Erscht bim friee Nachtässe het denn dr Mull d Katz ussem Sagg gloo und gsait, was mir no vor uns hänn: e Bsuech vom Gölä -Konzärt im neue Thun Stadion. Mit Helikopter und miteme Kraane isch denn dä „geili Siech“ uf d Bühni koo.
S Stedli vo Thun isch wirgligg super-schöön; bsunders am Aarekanal. E Gheimtipp zum lädele und flaniere. Die aint Gruppe, het e bruutale Trail miesse mache. „Schnuuf, schnuuf ...“ E Dailstügg isch öbbe tuusig Stäägedritt uffe gange. Am Schluss vom „Fox Trail“ het me sich zum Apéro im Stedtli troffe. Per Sälbscht-usslööser, hets denn die glatte Föteli gää.
E paar Frooge an ______________________________________________________
Dasmol hämmer grad zwei Persoone befrogt. Dr Groobi und dr Schlächti. Dr gliichnaamig Schnitzelbangg isch syt dr erschte Stund vo dr Yyschällette quasi als „Huusbangg“ drbi.
Name Die Groobschlächtige Alter 45 (dr Schlächti)
und 46 (dr Groobi) Zivilstand beidi höörig Kinder null bis zwei Bruef Metzger (blöödi Froog) Wie würd e Wärbeslogan iber di lute? Dr Groobi: „Rubbel Dich ins Glück“.
Was würdisch an dim Uusgsee ändere? Dr Schlächti: Alles, usser mi Frisuur. 3 positivi Aigeschafte vo dir? Dr Groobi: 3 ?? Ich ha nit emol gwüsst, dass ich eini ha!
Was sinn dini Hobbys? Dr Schlächti: Ich sammle alli Zytigsusschnitt über d Francine Jordi.
Was hesch welle wärde, wo de öbbe 10 Joor alt gsi bisch? Dr Groobi: Jetzt dängge dr sicher "11"… und das isch au korräggt eso.
Mit was hesch als Kind am liebschte gspiilt? Dr Schlächti: Mit mim… wie heisst das schrunzlige, stinggige Ding scho widder? ….. mit mim Brueder! Was kritisiersch an dir sälber? Dr Groobi: Ich gsee gäärn dr Kaarli Schwyzer.
Was wär di Traum vom Abentüür? Dr Schlächti: e Voorfaasnachtsuffdritt immene glaine, änge Käller im Gundeli. Wo verbringsch die nägschte Ferie? Dr Groobi: Do muess ich mi Bewäährigs-hälfer frooge.
Was issisch, dringgsch am liebschte? Dr Schlächti: Ich bi militante Vegetaarier.
Was loosisch gärn fir Musig? Dr Groobi: alles, nur kei Francine Jordi.
Lääsisch grad e Buech, und um was goots? Dr Schlächti: jo, die verfl*“@&... Betriibs-aaleitig vom mim Handy und ha kai blasse Schimmer!
Du dörftisch e neys Gsetz kreiire – welles wär das? Dr Groobi: das d Lüt au bi unsere schlächte Värs toobe mien. Iber was fir Glainigkaite kasch di ergere? Dr Schlächti: mi Loohn.
In was wärsch gärn e Superstar? Dr Groobi: do muesch mi Frau frooge.
Welli 3 Sache würdsch uff e ainsaami Insle mitnää? Dr Schlächti: zwei grossi Köffere und s Ööfeli.
Wenn dr Arzt würd saage, du hesch nur no 24 Stund z lääbe, was machsch? Dr Groobi: ich hoff, dass ich bald widder uffwach!
E gueti Fee schänggt dir spontaan Fr. 25'000.- zum «verputze». Was machsch drmit? Dr Schlächti: e Wuche Ferie in dr Schwyz .... wenns längt!
Wo usser dr Schwyz, kennscht dr au no vorstelle z lääbe? Dr Groobi: im Glaibasel. 3 spontaani Gedangge zer Faasnacht? Dr Schlächti: Morgestraich, Bermuda Dreiegg und Ussnüechterigs-Zälle.
_____________________________________________________ Basel ganz friener
Basel anno dazumal. E glaini Usswahl an interessante Föteli vo vergangene Daage.
Grad do links, zwar noni soo alt (1972): d Mischtfingge im Altersheim Bruederholz
bim stopfe vo de Chätzli
Näbedraa: Egge Gryffegass /Rhygass. 1930. .
Ganz unde: d Wescht-Syte vom Märtplatz. An däm Egge, vo s Gässli uffe goot, isch hüt
dr Tabagg-Laade. Do trifft me gege s Ändi vom Cortège immer d Luftschnapperli aa! Vo wenn d die Uffnaam isch, isch nit klar.
Diverses _______________________________________________________________
Hesch gwüsst ...
... dr Mull, schafft jetzt no anere
„Kotlett-Stuehl“ – eehh Schnitzel-Bangg
Karriere!? Als XXL-Waggis het är die
grossi Eehr kaa bim Top Bänggler
„s spitzig Ryssblei“ mit z’mache. Als
Helgeliwänder het är am Mimösli e paar
gwaltigi Ufftritt kaa.
Dr –minu het uff persöönligi Aafroog
vom Redaggter e Fasnachts-Gschichtli
„e Fasnachtstraum“, zum abdrugge
gmailt. Wär das übelääse sött haa,
schnäll zruggblettere uf d Syte 3!
Danggscheen –minu!!